பாம்படத்து பாட்டி - ராஜலக்ஷ்மி
கம்பன் வீட்டு கட்டுத்தறி மட்டுமல்லவே - எங்க
பாட்டியம்மா பாம்படமும் கவிபாடுமே!
பல்லு குத்தும்போதும் பாட்டு - அவ
நெல்லு குத்தும்போதும் பாட்டு
நடவு நடுகையிலும் பாட்டு
அறுவடையிலும் அவ பாட்டு
உலக்கையோடு
உரலு போடும்
ஓசைகேற்பவே - அவ
வளத்த காது பாம்படமும்
ஆட்டம் போடுதே!
வெறகடுப்பில் சமச்சபோதும்
சலிச்சி போகல - அவ
அம்மியில அரச்சபோதும்
அலுத்து போகல
சால மீனு கொழம்பு வாசம் ஊர அள்ளுதே - அவ
சட்டியில செய்யும் போது எச்சில் ஊறுதே
அப்பங்கூட சண்ட போட்டு
ஆச்சி வீடு தேடி வந்த
கோபக்கார பேச்சியையும் - அவ
ஆக்கி வச்ச கொழம்பு வாசம்
வந்த கோப தாபமெல்லாம் வத்தி போக செய்யுதே
வாழ எலைய விரிச்சி போட்டு
மத்தியில நரம்ப நசுக்கி
வக்கணையா கொழம்ப ஊத்தி
பேச்சி ருசிக்கிறா - அவ
ருசிச்சி ருசிச்சி சப்பு கொட்டும்
அழகத்தான அப்பத்தாவும்
ரசிச்சி பாக்குறா
எங்க ஆச்சி கைமணம் ஏழூறு எட்டுமே! - அவ
பாசத்தோட ஊட்டயில தின்ன வயிறு முட்டுமே!