நானும் அவனும் - புவனேஸ்வரி
வானம் பார்த்து வாடும் நிலம் போல
நிலம் பார்த்து பொழியும் மழை போல
நானும் அவனும்
நிலவுக்காக எரியும் சூரியன் போல
சூரியனின் நிழலாய் வாழும் நிலவு போல
நானும் அவனும்
இலை மீது உறவாடும் மழைநீர் போல
மழை நீரை சேகரிக்கும் இல்லை போல
நானும் அவனும்
மண்ணுக்குள் பரவிடும் வேர் போல
வேருக்கு துணை நிற்கும் மண் போல
நானும் அவனும்
முள்ளோடு நகரும் காலம் போல
காலத்துக்காக சுழலும் முள் போல
நானும் அவனும்
உரையாடலுக்குள் ஒளிந்திருக்கும் மௌனம் போல
மௌனமே மொழியாகும் உரையாடல் போல
நானும் அவனும்
இசையோடு சேர்ந்த தமிழ் போல
தமிழோடு சங்கமித்த இசை போல
நானும் அவனும்
முடிவை நோக்கி பயணிக்கும் தொடக்கம் போல
தொடக்கத்திற்கு நிறைவு தரும் முடிவு போல
நானும் அவனும்
பல்லாயிர மொழிகள் சுமந்த உலகில்
புரியாமல் திரியும் இரு மொழிகள்
நானும் அவனும்
எதிராய் எதிர்த்து , புதிராய் புன்னகைக்கும்
நிரந்தர தொல்லைகளாய்
நானும் அவனும் .. !
{kunena_discuss:779}