என் ராஜகுமாரி - புவனேஸ்வரி
மடியில் உறங்கி கொண்டிருந்த கணவனின் முகம் பார்த்தேன்
எத்தனை நிம்மதியான உறக்கம் ?
திருமணத்திற்கு முன்பும் பின்னும்
ஆணுக்கு மட்டுமே கிடைத்த வரம் சுதந்திரம்
பெருமூச்சுடன் நினைவு பெட்டகத்தை திறந்தேன் !
திருமணத்திற்கு முன் எங்கள் வீட்டின் இளவரசி
முடிசூடா ராஜகுமாரி நான் !
அதிகாலை என்பதே எனக்கு
அன்னையின் செல்லமான கோபக்குரல் ஒலிக்கும்போதுதான் !
அதுவும் தந்தையை சாக்கு காட்டி
மிரட்டி எழுப்பிடும் தாயிடம் தினமும் லூட்டி !
பல்துலக்கும் முன்பே அம்மாவின் தயவில் காபி
தம்பிக்கு வைத்ததையும் திருடிக் குடிப்பதில் தனி ருசி !
மங்களகரமாய் குளித்து தோற்றமளிக்கும் அம்மாவுக்கு
கன்னத்தில் சுடச்சுட என் காலை முத்தங்கள் !
சீ போடி என்று சிணுங்கி கோபபட்டாலும்
எத்தனைமுறை அதை மனதிற்குள் சேர்த்து வைத்தாயோ !
அம்மா , உன் கன்னங்கள் இப்பொழுதெல்லாம்
என் முத்தங்களை தேடுகின்றனவா ?
குளித்து முடித்தவுடன் தந்தையின் தட்டிலிருந்து இட்லி ஒரு வாய்
தம்பியின் தட்டில் இருந்து ஒரு பூரி கடன் !
அம்மாவின் சேலை முந்தானையில்
ஈர கரங்களை துடைத்துவிட்டு உணவுடன் தொடங்கும் போராட்டம்!
பிடித்ததை எல்லாம் வாங்கி தரும்படி தந்தையிடம் கொஞ்சல்
அறிவுரை கூறும் அன்னையிடமோ விழிகளை சுருக்கி கெஞ்சல் !
சண்டைபோடும் தம்பியுடன் அடிதடி
நான் கண்விழித்துவிட்டாலே வீடெங்கும் கேட்கும் சரவெடி !
கத்தியை விட என் கண்ணீரே வீட்டில் கூர்மையான ஆயுதம்
பஞ்சுமெத்தையை விட என் தந்தையின் மடிதான் எனக்கு உறைவிடம் !
என் செல்லப்பிராணி கூட எனக்கே தரும் முன்னுரிமை
எங்கெங்கும் எடுபடும் பெண்ணிவளின் பேச்சுரிமை !
இன்றோ, அலாரத்தை மௌனமாக்க அதிகாலையில் கண்விழிக்கும் நான்
சுப்ரபாதத்தை உயிர்பித்துவிட்டு ஜன்னல் வழியே தொலைந்துபோன சுதந்திரத்தை தேடுவேன் !
எனக்காக காபி குடிப்பதை மறந்து
வீட்டில் உள்ளவர்கள் தேவைகேற்ப பம்பரமாய் சுழலும் என் கைகள் !
கொண்டுவரும் காபியை குடித்துமுடிப்பதற்குள்
செல்லமாய் கொஞ்சிடும் என் கணவன்
எனக்கு கிடைக்கும் அன்றாட ஆறுதல் பரிசு அது !
மனதிற்குள் மெச்சுவாரோ என்னவோ
மௌனமாகவே என்னை கண்காணிக்கும் அத்தை
என்றாவது அதிசயமாய் நீ சாப்பிட்டியா ? என்று கேட்கும்போது
பெற்றிடுவேன் இரண்டாம் ஆறுதல் பரிசு !
காலையுணவு பரிமாறும் வேளை,
எனக்கு பிடித்த உணவுகளை நினைவுகூர்ந்து கொண்டே
தட்டில் வைப்பேன் கொஞ்சமும் பிடிக்காத உப்புமா
அதையும் ரகசியமாய் கணவன் ஊட்டிடும்போது
கிடைத்திடுமே எனக்கு மூன்றாவது ஆறுதல் பரிசு !
வரேன் அண்ணி என்பார் கணவனின் தம்பி
என்னிடம் சண்டை பிடிக்கும் தன் சகோதரனின் பிம்பம் நினைவில் !
காதலுடன் கணவன் பார்க்கையில்,
ஒரு கணம் சுதந்திர வானில் நான் !
அதற்குள் தடுத்திடும் அத்தையின் குரல்
இன்னைக்கு என்ன சமையல் என்றவாறே
ஏனோ அன்னையின் ஞாபகம் வரும்
அவரும் இப்படித்தான் கேட்பார் எனக்காக சமைத்திட !
என் வீட்டில் ஆயுதமான கண்ணீருக்கு இங்கு நீலிக் கண்ணீர்
என பெயர் வருமோ என்ற அச்சம் !
வராத கண்ணீரை வரவழைத்து அடம்பிடித்தவள் ,
வரும் கண்ணீரை கூட கண்சிமிட்டி மறைக்க கற்றுக்கொண்டேன் !
ஆனால் இன்று கண்ணீர் இல்லை
காரணம் எனக்குள் துளிர் விட்ட எங்களுயிர்!
இறைவனிடம் வரம் கேட்கிறேன்
எனக்கொரு மகள் வேண்டும் !
நான் ஏங்கும் சுதந்திரத்தை
அவளுக்கு நான் தரவேண்டும் !
என் இம்சைகளில் அன்னை கண்ட சுகத்தை
இன்று நான் அனுபவிப்பதற்காக
பிறந்து வரட்டும் என் ராஜகுமாரி !
திருமண பந்தம் மிக அழகானது என்பதில் எனக்கும் மாற்று கருத்து இல்லை .. எனினும் இப்படியும் ஓர் உணர்வில் இருக்கும் சகோதரிகளுக்கு என் கவிதை அர்ப்பணம்
{kunena_discuss:779}
The above article / story / poem is a copyright material and is published with the consent of the author. If you find any unauthorized content do let us know at
Chillzee is an entertainment website and all the content published here are for entertainment purpose only. Most of the content are fictional work and should be treated accordingly. Information on this website may contain errors or inaccuracies; we do not make warranty as to the correctness or reliability of the site's content. The views and comments expressed here are solely those of the author(s) in his/her (their) private capacity and do not in any way represent the views of the website and its management. We appreciate your high quality of listening to every point of view. Thank you.