ஜென்ம ஜென்மமாய் உன்னோடு நான் - புவனேஸ்வரி
என்னை களவாடிய நட்பே
இதுவரை பேராசை என்பது எனக்கில்லை
ஆனால் நீ என்னுள் வந்தப்பின்
நியாயம் இல்லாத ஆசைகள் கொட்டிக் குவிகின்றன !
நேற்றுவரை வீட்டை துறக்கும் எண்ணமில்லை
இன்று உன்னை அழைத்து கொண்டு எங்கேனும் கம்பி நீட்டிட விழைகிறேன் !
நேற்றுவரை ஊட்டி விடச் சொன்னவள்
இன்று நீ பசி என்றதும் ஊட்டிவிட ஆசைபடுகிறேன் !
நேற்றுவரை தனிமையை ரசித்தவள்
இன்று உன்னுடன் சேர்ந்து தனிமைக்கே தனிமை தர விரும்புகிறேன் !
நேற்றுவரை அனைவரையும் உயர்வாய் நினைத்தவள்
இன்று உன் கீர்த்தியை மட்டுமே பெரிதென பாட துடிக்கிறேன் !
நேற்றுவரை இசையில் லயித்தவள்
இன்று உன் உளறல்களை ரகசியமாய் சேகரிக்கின்றேன் !
நேற்றுவரை ஓவியம் வரைந்தவள்
இன்றுமுதல் உன்னோடு சேர்ந்து கிறுக்கல்களை வரைந்திட ஏங்குகிறேன் !
நேற்றுவரை கைப்பேசியின் குரலில் கண்விழித்தவள்
இனி வாழ்நாள் முழுவதும் உன் குரலில் கண்திறக்க தவமிருக்கிறேன் !
நேற்றுவரை அஹிம்சையை கடைப்பிடித்தவள்
இன்று உன்னை யாரும் தவறாய் பேசினால் வன்முறையில் இறங்குகிறேன் !
நேற்றுவரை பொதுநலமாய் இருந்தவள்
உன்னை மட்டும் யாருடனும் பகிர்ந்து கொள்ள விரும்பாமல் சுயநலவாதியாகிறேன் !
காதலில் மட்டும்தான் ஒவ்வோர் உணர்வும் அதிசயம் என்று யார் சொன்னது ?
காதலில் மட்டும்தான் உலகம் அழகாகும் என்றும் யார் சொன்னது ?
எங்கோ பிறந்து , எங்கோ வளர்ந்து
வெவ்வேறு சிந்தனைகளை தழுவி !
வெவ்வேறு மாற்றுகருத்துகளை பின்பற்றி
யாருக்கும் வளைந்து கொடுக்காமல் நிமிர்ந்து !
பயணித்து கொண்டிருந்த நாம்
இன்று நட்பின் மெத்தையில் !
அன்பெனும் போர்வையில்
இயற்கையும் பொறாமையுடன் தாலாட்டும் இனிய வசந்தத்தில்
ரம்யமான நிலையில் விழிமூடாமல் கனவு காணவில்லையா ?
எத்தனையோ அலுவல்கள்
நாள் முழுதும் அலைச்சல்கள் !
கடமை என்ற பெயரில்
கர்ணனின் கவசகுண்டலமாய் முகத்திரைகள் !
அத்தனையும் உன்னை கண்ட ஒரு நொடியில் கலைந்துவிடுவதில்லையா ?
சோர்ந்து போகும் பாலை உன்னை பார்த்ததும் சோலையாகவில்லையா ?
தொட்டால் அடங்கிவிடும் காதலுக்கு கூட தெரியாது
உணர்வுகளை தொட்டுத் தழுவும் நட்பின் ரகசியம் !
உரக்க பேசினால் கண் கலங்கிடும் காதலுக்கு கூட தெரியாது
உரிமையின் உறைவிடம் நட்பில் தான் இருக்கிறதென்று !
மீண்டும் ஓர் ஜென்மம் இருந்தாலும்
எனக்கு நீ மகனாகவோ மகளாகவோ வேண்டாம் !
உனக்கும் எனக்கும் ரத்தபந்தம் வேண்டாம்
தொப்புள் கொடியை பகிர வேண்டாம் !
இன்று தொடங்கிய நட்பெனும் உறவே
ஜென்ம ஜென்மமாய் என்னை உன்னோடு இணைக்கட்டுமே!
{kunena_discuss:779}