கிளம்பறேன்... எதுனானா போன் போடு... உன் வீட்டுக்காரரும் வெளிய வர முடியாம மாட்டிக்கிட்டாரு...”
“என்னா பண்ணம்மா... அவங்க இருக்கற தெருவுல ஒரே வீட்டுல எட்டு பேருக்கு கொரோனாவாம்... அதால அந்த தெருவையே அடைச்சு வச்சுட்டாங்க... அவசரத்துக்கு கூட வெளிய வர முடியலைன்னு சொல்லிட்டு இருந்தாரு...”
“எப்போதான் இந்த கிருமி சனியன் ஒழியுமோ... வேலைக்கும் போவ முடியாம, கடையும் திறக்க முடியாம எல்லா ஜனங்களுக்கும் அல்லாட்டமா இருக்கு...”
“நீ வேலை செய்யுற வீட்டம்மா நல்லவங்களா போய்ட்டாங்கம்மா... சம்பளத்த பிடிக்காம கொடுத்துட்டாங்க...”
“ஆமாண்டி... இல்லைன்னா கஞ்சிக்கே வழியில்லாம போயிருக்கும்... புள்ளத்தாச்சி பொண்ணு உன்னை வச்சுட்டு என்னா பண்ணி இருப்பேன் நானு... உன் வீட்டுக்காரரும் வேலைக்கு போவலை...”
“இந்தா தெறப்போம், அந்தா தெறப்போம்ன்னு சொல்றாங்களே தவிர டாஸ்மாக்கைத் தவிர ஒண்ணையும் தொறக்க மாட்றாங்க... சாராயம் எப்போ அத்தியாவஸ்ய சாமானா மாறிச்சுன்னு தெரியலை... இவரு வேற மூணு மாசம் சம்பளம் இல்லை... கைல இருக்கற காசெல்லாம் காலி ஆவுதுன்னு ஒரே புலம்பிட்டு இருக்காரு... ஏதோ என் மாமியா ரோடு கூட்டுற வேலைக்கு போவுதோ பசியில்லாம குடும்பம் தப்பிக்குது...”
“யாராண்ட பேசினாலும் இப்படித்தாண்டி ஒரு கதை சொல்றாங்க... இந்த நோயால சாவாட்டாலும், பசி பட்டினிலையே நிறைய உசிரு போய்டும் போல... சரி பேசிட்டே இருக்கேன் பாரு... நான் கிளம்பறேன்... போனை பக்கத்துலையே வச்சுக்கோ... எதுனாச்சும்ன்னா உடனே சொல்லு... நான் பக்கத்துல முத்தம்மாக்கிட்ட உன்னைய மதியம் வந்து பார்க்க சொல்லுறேன்....”
“சரிம்மா, நீ கவனமா போயிட்டு வா...”, சாந்தியின் அன்னை கிளம்ப, மெதுவாக கதவை பூட்டிவிட்டு வந்து அமர்ந்தாள்...
சாந்திக்கு இது ஒன்பதாவது மாதம்... முதல் முறை கருவுற்றபோது வந்த காய்ச்சலால் நான்கு மாதத்தில் கரு கலைந்துவிட்டது.... அதனால் இந்த முறை அவளின் மாமியார் வீட்டிலும் சரி, அம்மா வீட்டிலும் சரி மிக கவனமாக அவளை பார்த்துக்கொள்கிறார்கள்... மருத்துவர் குறித்த தேதிக்கு இன்னும் இரண்டு வாரம் இருக்கிறது....
தன் கணவரிடம் அடுத்து அரை மணி பேசியவள் பசியெடுக்க குளித்து சாப்பிடலாம் என்று குளியலறை நோக்கி சென்றாள்... குளித்துக் கொண்டிருக்கும்போதே தொடர்ந்து அலைபேசியில் அழைப்பு வந்து கொண்டிருக்க யாருக்கு என்னவோ என்ற பதற்றத்தில் ஒரு நைட்டியை மாட்டிக்கொண்டு சற்று வேகமாக வர, கால் வழுக்கி தரையில் விழுந்தாள் சாந்தி...
தொடரும்
Next episode will be published on 23rd Dec. This series is updated weekly on Wednesdays.