தொடர்கதை - எங்கே என் காதலி? எங்கே...? எங்கே...? - 35 - பிந்து வினோத்

வீட்டிற்கு வந்தப் பிறகும் அத்விதாவிற்கு மனதில் பொங்கிக் கொண்டிருந்த சந்தோஷத்தினால் வானில் பறப்பது போல இருந்தது... அவளுடைய பாதங்கள் பூமியில் பட்டதா என்றுக் கூட அவளுக்கு சந்தேகமாக இருந்தது...

“அத்வி, இன்னைக்கு கார்த்திக் வீட்டுல இருந்து எல்லோரும் வருவாங்க... சீக்கிரமா எழுந்து ரெடி ஆகனும்... இப்போ தூங்கினா, கொஞ்ச நேரமாவது தூங்கலாம்... போய் தூங்கு” என்று மகளிடம் அன்பாய் சொன்னார் அர்ச்சனா...

“சரிம்மா...” என்று சொல்லிவிட்டு ரூமிற்கு சென்று படுத்த அத்விதாவிற்கு தூக்கமே வரவில்லை...

கார்த்திகேயனிற்கு போன் செய்யலாமா என்று அவள் யோசிக்க, அவனிடம் இருந்தே அவளுக்கு ஃபோனில் அழைப்பு வந்தது...

அழைப்பை உடனே ஏற்று, போனை காதில் வைத்தாள்...

“அத்வி...!!! என்னோட செல்லமான அத்வி பேபி...”

“...”

“என்ன அமைதியா இருக்க??? கூட்டமா இருக்க இடத்துல தான் உன்னோட காதல் அட்ரினலின் அதிகமா வேலை செய்யுமா???”

“கேடி...”

“அத்வி, மை ஸ்வீட் அத்வி... அப்படி ஒரு வரவேற்ப்பை நான் எதிர்பார்க்கவே இல்லை... இட் வாஸ் அ ப்லேஸன்ட் சர்ப்ரைஸ். ஸ்வீட், வெரி வெரி ஸ்வீட் சர்ப்ரைஸும் கூட...”

“ஹுஹும்... நான் ப்ளான் செய்யலைடா... உனக்காக வெயிட் செய்துட்டே இருந்தேனா... உன்னை பார்த்ததும் எதுவுமே புரியலை...”