மதியூர் மிஸ்டரீஸ் : 2 : தொடர்கதை - அழகின் மொத்தம் நீயா? - 01 - Chillzee Story
This is a Mathiyur Mysteries Novels series episode. Visit Mathiyur Mysteries Novels series page for other current Chillzee Original stories.
ஐந்து வருடங்களுக்கு முன்.
“ஹலோ!”
வினாயக்கின் குரல் எங்கேயோ கேட்டதோ இல்லையோ, ப்ரியம்வதா தன் முன்னே இருந்த கறுப்பு கலர் கண்ணாடி மேஜையில் தெரிந்த அவளுடைய பிம்பத்தை பார்த்து தன்னை தானே சரி பார்த்துக் கொண்டாள்! அவள் கட்டி இருந்த லைட் எல்லோ நிற சேலை அவளுக்கு நன்றாக தான் பொறுந்தி இருந்தது! காற்றில் பறந்து நெற்றி மீது பட்டுக் கொண்டிருந்த சிறுக் கற்றை முடிகள் அவளின் வட்ட வடிவ முகத்திற்கு தனி அழகை கொடுத்துக் கொண்டிருந்தது!
“ஹலோ ப்ரியம்வதா!” ப்ரியம்வதா எதிர்பார்த்தது போலவே அவள் பக்கத்தில் இருந்த சீட்டில் அமர்ந்தான் வினாயக்.
“குட் மார்னிங் வினாயக்!” ப்ரியம்வதாவின் கண்கள் ரகசியமாக வினாயக்கை ரசித்தது. வினாயக் எப்போதும் போல ‘லேஸி சைன்டிஸ்ட்’ லுக்குடன் இருந்தான். சரியாக வாரப் படாமல் இருந்த அவனுடைய கேசம் ஏசி காற்றில் படபடத்து ப்ரியம்வதாவின் இதயத்தை தடதடக்க வைத்தது. இரண்டு வருடமாக அவள் மனசுக்குள் பூட்டி வைத்திருக்கும் காதல் எப்போதடா வெளியே வருவோம் என்று தவித்துக் கொண்டிருந்தது.
“இன்னைக்கும் புடவையா? உன் கம்பெனி ஐடி போட்டோல மட்டும் வெஸ்டர்ன் ஸ்டைல்ல இருக்க. மத்தபடி நான் உன்னை பார்க்கும் போதெல்லாம் இப்படி தான் வர!” வினாயக் அலுத்துக் கொண்டாலும், அவன் சொன்ன விதத்தில் புகார் இருப்பதாக தெரியவில்லை.
“நான் என்ன செய்ய? எனக்கு புடவை கட்டனும் தோணுறப்போ கரக்ட்டா நீ வர!” ப்ரியம்வதா அவளுடைய மனதிலிருந்த காதலை மறைத்து அவனிடம் பேசினாள்.
“அப்படி தான் இருக்கும் போலருக்கு. ரொம்ப பிஸியா இருக்கேன் ப்ரியம்வதா. என்னோட சைபோர்க் (cyborg) வேலை மும்முரமா போயிட்டு இருக்கு. இந்த வருஷம் முழுசா வொர்க் செய்ற சைபோர்க் ரெடி செய்திருவேன். ஐ ஜஸ்ட் கான்ட் வெயிட் டு ஸீ மை சைபோர்க் பேபி!”