ப்ரியா அதை எதிர்பார்க்க போவதில்லை, இருந்தாலும் அனுப்பி விடுவது என்ற முடிவோடு, ஃபோனை கையில் எடுத்து, 'குட் நைட் ப்ரியா' என்ற செய்தியை அனுப்பி விட்டு இரவு உணவை உண்ண துவங்கினான்.
🌼🌸❀✿🌷
செல்ஃபோன் மெல்ல சினுங்கவும் அவசரமாக அதை எடுத்துப் பார்த்த ப்ரியாவிற்கு விக்கிராந்தின் மெசேஜை படித்தப் பின்பு தான் இயல்பாக மூச்சு விடவே முடிந்தது!
அவனுக்கு பதில் அனுப்பலாமா என யோசித்தவள், வேண்டாம் என முடிவு செய்து, ஃபோனை மீண்டும் மேஜையில் வைத்தாள்.
மனம் தெளிந்து விட, மறுநாளுக்கான உடைகளை தயாராக எடுத்து வைத்து விட்டு தூங்க சென்றாள்!
ஆனால் தூக்கம் வருவது தான் எளிதாக இருக்கவில்லை!
புரண்டு புரண்டுப் படுத்தவள், அவ்வப்போது செல்ஃபோனில் விக்கிராந்த் அனுப்பி இருந்த மெசேஜை மீண்டும் மீண்டும் எடுத்துப் படித்தாள்!
எத்தனை முறை படித்தாள் என்ற கணக்கே இல்லாமல் படித்தாள்!
மீண்டும் மனதினுள் என்னவென்று சொல்ல முடியாத ஒருவிதமான இனிய உணர்வு தோன்றி இருந்தது!
அது என்ன ஏது என்று அலசி ஆராய விருப்பம் இல்லாமல், மீண்டும் செல்ஃபோனை எடுத்து விக்கிராந்தின் குட் நைட் மெசேஜைப் படித்தவள், அதில் தெரிந்த விக்கிராந்த் எனும் பெயரை மெல்ல விரல்களால் தடவினாள்!